تمثال الملك حورس اصلي

حورس ، فى الدين المصرى القديم ، اله مصرى و ابن اوزوريس و ايزيس. و عنصر من عناصر تاسوع اون. انتقم من عمه سث اله الشر اللى قتل ابوه اوزوريس. صوره المصريين عادة على هيئة صقر او بنى ادم له راس صقر. اتعبد فى مناطق كتيره ، و بيرمز بيه لمعبودات كتيره ، فهو مثلاً رب السما و عينيه الشمس و القمر ، وهو الشمس نفسها بإسم رع-حور-آختى ، و هو الاله الملكى و كانوا الملوك بيتلقبوا بإسمه حورس ، وهو اله الانتقام عشان انتقم من عمه الى قتل ابوه  

ابوه اوزوريس كان ملك مصر لحد ما اخوه سث قتله عشان ياخد هو الحكم ، وعشان يضمن سث ان اخوه اوزوريس مش هيرجع تانى قطع جثته لواحد واربعين جزء و دفن كل جزء فى مكان مختلف فى انحاء مصر و انفرد هو بالحكم . زوجه اوزوريس - ايزيس - بدأت تسافر فى كل انحاء مصر وابتدت تدور و تجمع اجزاء جثه جوزها اوزوريس بمساعده الهه تانيين و لما قدرت تجمع كل الاجزاء استخدمت تعويذه سحريه وقدرت ترجع اوزوريس للحياه لمده يوم واحد وفى اليوم ده حملت منه فى حورس وبعدها خبت جثه اوزوريس و سافرت لدلتا مصر واستخبت وسط الناس واخفت شخصيتها الحقيقيه عن الناس عشان كانت عارفه ان لو سث عرف انها عايشه وحامل هيقتلها ويقتل ابنها ، وبعد 9 اشهر اتولد حورس الى ايزيس اهتمت بيه جدا ودربته كويس اوى ، ولما كبر حورس وبقا راجل حكت له ايزيس حكايه ابوه والى عمله عمه فأقسم حورس انه ينتقم . ابتدت حروب كتير بين حورس وعمه سث لسنين طويله وكان حورس دايما بيكسب ، وفي اخر معركه حورس خسر عينه الشمال لكنه قدر بعين واحده يكمل المعركه و يقتل سث وياخد منه حكم مصر ، وبكده يبقا انتقم لابوه اوزوريس